თედო ბექიშვილი - კავთისხეველი

გუშინ კავთელი კაცისგან 

ვაშლი ვიყიდე კეხურა. 

ნამდვილი ქართლელი იყო, 

ეცვა უბრალოდ, გლეხურად, 

ტანად ჯმუხი და მგლის ფერი, 

თავს ნაბდის ქუდი ეხურა.

სულ ლამაზები მირჩია, 

ზედმეტიც გადმომაყოლა. 

სხვა ორ მანეთად ჰყიდიდა, 

იმან მანეთად აწონა. 

წამოვე გახარებული, 

იმისი მამა აცხონა!

ზამთრის ამ ცრიატ ამინდში 

მზემ თბილად გამოაშუქა, 

იმ კარგმა კაცმა კავთელმა 

ათი წლით გამაჭაბუკა, 

ვაშლი ხომ ვაშლად მომყიდა -

ეს ლექსიც იმან მაჩუქა.