თედო ბექიშვილი - ფესვები

გუშინ

ელექტროხერხით მოვხერხე

სახლის წინ მდგარი (პაპის დარგული)

ხეები მსხლისა.

საღამოს, სუფრას რომ მივუჯექით,

დედამ დალია

პაპაჩემის შესანდობარი

და წყვილი ცრემლიც დააწვეთა...

ღამით მესიზმრა,

თითქოს სახლი მიჰქონდა მეწყერს

და მოხერხილი მსხლის ფესვები

მკლავებივით ეხვია ლიბოს...

ხშირად სიზმრად რატომ ვნახულობთ

მას, რაც ცხადში უნდა გვახსოვდეს?