ჯანო გიორგაძე - მონასტრის ეზო...

მონასტრის ეზო, მკრთალი დაისი,

ქარი შეარხევს ობოლ კიპარისს

და სულში რაღაც აკვნესდა, ისე

ვით გაწყვეტილი სიმი გიტარის.

მონასტრის ეზო, ჩრდილი ნაძვების,

მწვანე ბალახზე თეთრი მტრედები.

ირგვლივ ხის ჯვრები და მონაზვნები,

ღმერთთან შეხვედრის მოიმედენი.

ნეტარებას ვგრძნობ მართლაც ზეციურს,

სულგანაბული ვდგავარ და ვტკბები.

გაფრენილ ფიქრებს დავედევნები

ანგელოზების ცისფერი ფრთებით.