დოდო აბაშიძე - არ გვინდა ჭაჭის არაყი...

არ გვინდა ჭაჭის არაყი,

უნდა მივირთვათ აბსენტი,

თბილისი უკვე ინგლისობს

ამერიკული აქცენტით.

არ გვინდა ჩაი ინდური,

არცა თურქული ფახლავა,

არ გვინდა აზიელობა,

ევროპელები გახლავართ!

ჩვენი ნაწარმი არ გვინდა,

უხვად გვაქ სხვის ნასუფრალი,

სინდის-ნამუსის შენახვას

სექსი სჯობს თავისუფალი.

მიწა და წყალი გავყიდეთ,

ამითაც ვართ კმაყოფილი,

ვქეიფობთ სხვათა მონობის

უღელში თავგაყოფილი.

გამოვფხიზლდეთ და გავიგოთ

ეს მძიმე ტვირთი გვემძიმოს,

დრო არის გაღვიძებისა

როდემდე უნდა გვეძინოს?