იოსებ გრიშაშვილი - ყურადღება

თვალმერცხალა ჩვენმა ჯუნამ 

ეს თვე ზღვაზე გაატარა. 

მგრძნობიერი გოგონაა,

ყველა აქებს, დიდ-პატარა.

ის ისეთი კუდრაჭაა, 

ისე ნაზი, ისე კარგი...

 აი, დედას ზღვის კენჭები 

შეუგროვა მთელი პარკი.

ეს ლალია! ეს ზურმუხტი! 

ეს ალმასი, ფირუზქარი! 

მიპასუხე, დედიკონა, 

მოგწონს ჩემი საჩუქარი?

დედამ შუბლი დაუკოცნა, 

იგრძნო, გულში თუ რაც ხდება: 

- მე ამ ქვებზე უფრო მომწონს, 

შვილო, შენი ყურადღება!