აბდ ორ-რაჰმან ჯამი - მახედ ქცეული ...

მახედ ქცეული მაკავებენ შენი კავები,

ნანადირევად რომ გავები, შენი კავები.

შენი კავების კაკანათში ებმიან გულნი

და მათი ჟინით კანკალებენ შენი კავები.

მეღირსა, გავხდი იმათ მიერ შენაკავები,

შენს მონას მკლავენ მაგ მკლავებით შენი კავები.

შენი ღაწვების განთიადი სულ სხვაა, ოდეს

მუშკის ნიღაბით აღამებენ შენი კავები.

მშფოთვარე გულებს გასაოცრად იმორჩილებენ

მართლაც კავ-ანკესს ნამგვანები შენი კავები.

მთვარეზე მაღლა უკავიათ ადგილი მშვენი,

მიკვირს თავს როგორ იკავებენ შენი კავები.

მე ბედნიერად მითენდება, თუმც გამუდმებით

მაგ უკუნეთში მაკავებენ შენი კავები.