ლელა გაბური - ქარო

ქარო, რამე მომიტანე,

ცის ნამივით ცინცხალი,

თორემ უფლის ნაფეხური,

ვერსად ვეღარ ვიცანი...

ქარო, რამე მომიყევი,

სიყვარულზე ლამაზი,

თორემ ვეღარ მოვირჩინე,

დალეწილი არმაზი...

ქარო, რამე მომაგონე,

ვეფხვის, მოყმის სადარი,

თორემ... უკვე ვეღარ ვხედავ,

ივერია სად არი.

ქარო, იქნებ დამიბრუნო,

წიქარა და მზეწვია,

თორემ ვატყობ, მათ სანაცვლოდ,

დევის დედა მეწვია...

ქარო, იქნებ მომეფერო,

მომირჩინო იარა,

იქნებ მითხრა, რომ გრიგალმა,

უკვე გადაიარა.