ხარიტონ ვარდოშვილი - ღამე - მაღალი კუბო

ღამეს ბანდი აქვს შემოვლებული

სახე დაღარულ შავი ბინდების,

როდესაც მთვარე დასოვლებული

არის მოწყენით და გარინდებით.

გამოვა მკვდარის სული ვნებული

და ეძებს მალულ სამოთხის კარებს,

მზე - ღამეებით დამონებული

შველას სთხოვს მთაში დაკარგულ ქარებს.

სივრცე: უფსკრული დაუსაბამო

ჩრდილი ყვითელი და უფერული, 

მოელოდება ახალ საღამოს

რომ დააძინოს ფიქრი ველური.

იშვება სახე - სიზმარეული:

ეს ცვალებადი ჟამის ლანდია,

მაღალ კუბოში ვართ ჩამწყვდეული

და ვემონებით ღამეს ბანდიანს.