გიორგი ქუჩიშვილი - ქართულ სუფრაზე

გაშალეთ სუფრა! მოიტათ ღვინო!

მე ვარ მოლხინე და არა ლოთი!

დასძახეთ, ძმებო, ჰიმნი სალხინო,

რომ დავიწყნარო ღელვა და შფოთი!

მინდა დავლიო ბოღმა და დარდი,

რომ აღარ ვყავდე მონად, მსახურად;

კახეთის ზვრებში თუ ვარ ნაზარდი,

უნდა ვლაღობდე კიდეც კახურად.

მოიტათ ყანწი. ვინც აქ თავს იქებს,

მსურს გამოვცადო, შევება სმაში!

აბა, ერთხელაც დაჰკოცნეთ ჭიქებს! - 

იწყება ჯამის ხელში თამაში!

ჰო, ეგრე, ეგრე! გაამოთ ხალხო!

ნურც დაგხურვიათ მარნების კარი!

შაბაშ, ვინც ეხლა ეშხით დასძახოს

და გრძნობის ცეცხლით დაფერფლოს თარი!