ალექსანდრე აბაშელი - ტრიოლეტები

მსოფლიო ციხეა საზარი,

ტყვე არის არსება ყოველი, 

და სასჯელს არა აქვს საზღვარი

მსოფლიო ციხეა საზარი.

დარაჯად სიკვდილი მზად არი

მის ძახილს ყოველ წამს მოველი.

მსოფლიო ციხეა საზარი

და ტყვეა არსება ყოველი.

სიკვდილი ყოველ წამს უძახის 

მისგანვე უაზროდ არჩეულს. 

მძიმეა ლოდინი ტუსაღის.

სიკვდილი თავის მსხვერპლს უძახის.

იელვებს ბრმა თვალი ყრუ სახის -

და ძაძა დაჰფარავს ფარჩეულს.

სიკვდილი ყოველ წამს უძახის 

მისგანვე უაზროდ არჩეულს.