გალაკტიონ ტაბიძე - წიგნის შესახებ

რამდენი ქვეყნად

წიგნი იცემა

ღირსი, რომ ეგდოს

სანაგვის ბოლოდ.

მე კი მეგონა,

პატივისცემა

ნიჭს და ღირსებას

ეკუთვნის მხოლოდ.

ეს სასწაული

ვის არ სმენია:

დასავლეთისას

იყიდი პრესას

და იმის შემდეგ,

როგორც გენია,

მოევლინები

პოლდის, აგნესას.

ბევრს სისხლის სმისთვის

ხახაც აქვს, მადაც,

წიგნიც უნიჭოდ

ნაკერ-ნალამბი.

რად არ დაიწვის

დარაბა, სადაც

ჰიტლერის წიგნი

ძევს: „მაინ კამპფი“.