იეთიმ გურჯი - აღარც ღმერთი მწამს...

აღარც ღმერთი მწამს, აღარც სამყარო,

აღარც მსოფლიო მხიარულება,

ვერა ექიმი ვეღარ მომარჩენს,

რაც კი მე მტანჯავს ერთი წყლულება,

ქვეყნის დიდება და გახარება

მომცენ, სუყველა გამიზიარონ,

ჩემსა წამალსა ვერვინ იშოვის,

მთელი ქვეყანა შემოიარონ.

იმგვარი ცეცხლი მომკიდებია,

ჩემი ყვირილი ადის ცაშია,

მისი ჩაქრობა არ შეიძლება,

თუგინდ ჩამაგდონ შუა ზღვაშია.

ერთი მე ვიცი და ერთი იმან,

ვინც მე გამხვია ცეცხლის ალშია,

მე ის მომარჩენს, ანდა დამმარხავს,

ან გადამაგდებს ცოცხლივ წყალშია.

მე რომ სენი მჭირს, ის თითონ არი,

ჩემი ექიმი - მისივე ენა,

იეთიმ-გურჯს წამლად მისი თვალები

და მეღირსება მაშინ მორჩენა.