იეთიმ გურჯი - შენ წალკოტში გამატარე

ახალ ტანჯვის გზაზედ წაველ,

საჩივლელად ცაში აველ,

სიყვარულის ზღვაში შაველ,

ვიღუპები, ვეღარ გაველ.

ტალღებში ვარ, არ მყავს მშველი,

გეხვეწები მე თვალსველი,

მოწყალებას შენგან ველი,

ვიძირები, მომე ხელი.

სიყვარული გამიღრმავდა,

სულ დავკარგე, ვინც რო მყავდა,

შენთვის ენა ამიტყავდა,

მღერით ტვინი გამიქვავდა.

გაუტეხავი ქვისა ხარ,

მოუნათლავი ხისა ხარ,

ჯერ ხო თვრამეტი წლისა ხარ.

რად გამიცან, თუ სხვისა ხარ?

რად მარგუნე ბედი მწარე,

ნუ მატარებ ღობის გარე,

ღმერთს შახედე, გამახარე,

შენ წალკოტში გამატარე.

იეთიმ-გურჯსა შენა მყევხარ,

უკვდავების წყარო შენ ხარ,

განთიადის ცისკარს გევხარ,

შენ ამოსვლას გულით შევხარ.