იეთიმ გურჯი - ერთი მიყვარს

ერთი მიყვარს, ისიც მყვარობს,

მაგრამ ქცევამ გამაკვირვა,

თითქოს მისი კუკლა ვიყო -

მათამაშებს თავდაყირა.

ჩემსა ხატად მას ვლოცულობ,

მოწყალება გამიძვირა,

რაღაც ძვირად მევაჭრება,

მას ვგონივარ ყალბი ლირა.

როგორც უნდა მე მატყვილებს,

რაში გაზდის ენის ქირა,

როცა ვხედავ, მეცინება,

ზოგჯერ კიდეც ამატირა.

მეუბნება: აღუ, ბაო,

კაკას მოგცემ, დაიპირა,

იმის სროკი არ გათავდა,

ხან თვეა, ხან ორი კვირა.

სიყვარულის ზღვაში ვგდივარ,

მე ლოდინმა ჩამაძირა,

მე რაში ვარ დამნაშავე,

სიყვარულმა შამიპირა.

რა დღიდანაც გავიცანი,

იეთიმ-გურჯი შამიწირა,

ღმერთს შახედე, შამიბრალე,

მანიფესტი რა ქენ, სირა!