ვახტანგ ნადარეიშვილი - ცაცხვები

ცაცხვებს აქვთ რაღაცა ქალური,

შერხევა,

სურნელი,

სინაზე,

ჭორები - ფოთლების ხმაურით,

გუშინწინ რაც მოხდა იმაზე...

წვიმდაო,

წვიმდაო გუშინწინ,

დავსველდით ტოტიან-ფოთლიან.

- თქვენ ცაცხვებს ოღონდ ნუ დაუშლით

და ამბებს ამბებზე მოსთვლიან...

წვიმდაო,

წვიმდაო გუშინწინ,

უეცრად სად იყო, სად არა,

იმ ბიჭმა

ის გოგო

სიცილით,

ჩვენს ქვემოთ გამოატარა.

შვენოდათ ბავშვური სიცილიც,

და მერე...

ბავშვური დარცხვენაც,

წვიმდაო,

წვიმდაო გუშინწინ,

ისინიც იცდიდნენ ცაცხვებთან...

ცაცხვებს აქვთ რაღაცა ქალური,

შერხევა,

სურნელი,

სინაზე,

ჭორები - ფოთლების ხმაურით,

გუშინწინ რაც მოხდა იმაზე...