გიორგი კალანდაძე - მატარებლიდან

ყვავილების ველი...

კორდი...

კლდე და ჭალა...

რკინის მძლავრი ხელი

გაუშლია ქალაქს.

ელმავალი მიჰქრის

და სივრცეებს რკალავს.

გზებს უმშვენებს მტკვარი

და ქოლგები ხეთა, 

უკან დარჩა ჯვარი,

არმაზი და მცხეთა.

ბრწყინავს ზეცის კიდე,

შორს შვიდფერად ელავს

მდინარეზე ხიდი,

როგორც ცისარტყელა.

ცაზე ღრუბლის ქულა -

გაფრენილი მტრედი.

მზის ნამქერში ცურავს

კავკასიის ქედი.