ვახტანგ ნადარეიშვილი - და-ძმა

არჩილი მზიას ძმა არის,

დაზე ერთი წლით დიდია,

დილაადრიან სკოლაში

და-ძმანი ერთად მიდიან.

აღმზრდელი მასწავლებლები

მზიას უქებენ ქალობას:

მთელი წლის განმავლობაში

მხოლოდ "ხუთებზე" სწავლობდა!

სახელს არც ახლა შეირცხვენს,

კითხვებს პასუხობს თამამად.

მზია ბეჯითი გოგოა, -

კლასიდან კლასში გადავა.

მაგრამ არჩილი რას იზამს,

ნუთუ გააცდენს წელიწადს?!

მაშ რა ეგონა, ბზრიალას

რომ არ უშვებდა ხელიდან...

ერთი წლის უქმად გაცდენა

განა ადვილად ითქმება?!

ერთ წელიწადში ქარხნებში

მრავალი დაზგა იქმნება.

ერთ წელიწადში ქალაქად

ათასი სახლი შენდება,

მოედნები და ქუჩები

ალვის ხეებით მშვენდება.

ერთ წელიწადში მამილო

ხუთწლიან გეგმას ასრულებს,

ელექტროსადგურებისთვის

გლინავს ფოლადის მავთულებს.

ერთ წელიწადში მზიაც ხომ

სწავლაში წამოეწევა,

ერთ კლასში რომ იქნებიან,

ნახეთ არჩილის შერცხვენა.

მზიას სუყველა შეაქებს,

არჩილს ზედ არვინ შეხედავს;

ეს მარტო, არჩილს კი არა,

ზარმაცებს ყველას ეხება!