ნიკო რაზიკაშვილი - მერცხალს

არ ვიტყვი: "მიძლევიხარო",

მერცხალო, ჭიკჭიკ-ენაო!

გამარჯვებისამც იქნება

შენი აქ გადმოფრენაო.

მიამა შენი დანახვა,

შენმა და ჩემმა მზემაო!

ან აქამდისინ სად იყავ,

მითხარ, სად იმალებოდი?

ინდის, თუ ნილოსისა,

თუ ზღვის წყალს ეთელებოდი.

სად აყვავებულ მთა-ბარსა,

სად ტრამალთ ეგელებოდი?

მშვიდობა შენსა მოსვლასა,

ფრინველო, გაზაფხულისა!

დაჯექ, გვიამბე ამბავი

გაგონილ, დანახულისა,

ბევრჯელ მოგვგვარე ზაფხული

მშვიდობა, სიხარულისა.