ნიკო რაზიკაშვილი - მგლის ცრემლები

სხვის შვილად ნამყოფს ჩობანსა,

ფარა ერთიან გაუწყდა,

და სახლში გამობრუნება

ხელცარიელას მოუნდა.

მოდის შინისკე და პირი

არ გაეხსნება დანითა,

ისეთი ნაღვლიანია,

ისე მოკლული ვარმითა.

შემოეყარა წინ მგელი,

ამბავი ჰკითხა ძმობითა,

და უთხრა სამძიმარიცა

როგორც წესია, გრძნობითა.

თან თვალებიდამ მსხვილ-მსხვილი

ცრემლები ჩამოჰდიოდა!

მაგრამ გამოცდილს ჩობანსა,

მგლის სიტყვა არ მიჰდიოდა.

მის ცრემლზე უნებურადა

მეცხვარეს პირმა შეჰღიმა,

და თავის ჭირისუფალსა,

გამოცხადებით დაჰცინა:

"ერთი ეს მითხარ, გეთაყვა,

მაგრე რომ იცრემლებიო, -

რა არის მაგის მიზეზი,

ის რომ მე გებრალებიო,

თუ ის, რომ უცხვროდ თვითონ შენ,

შიმშილით გადაჰღრძებიო?"