ნიკო რაზიკაშვილი - თეთრი ქაღალდი

სანთელი ენთო მიბნედით,

შუქი თვალს არა ჰძალავდა,

მე კალამს ვაცოდვილებდი,

ფიქრი ტვინს არა ჰღალავდა.

ვნახე: გონჯს გუჯრის ფურცლებში

თეთრს ქაღალდს პირი უჩანდა,

და უნდა მეთქვა, რომ სხვებსა

მას არაფერი უგვანდა.

ლამაზს პირს თეთრი, უმტვერო

თოვლ-ფიფქი გადაეყარა,

და ღაწვი, როგორც მთვარესა,

ღრუბლიდამ გამოეპარა!..

ვნახე... და ხელი შემიდგა,

კალამი დამადებინა,

რა მომივიდა, არ ვიცი,

ნეტავი გამაგებინა!