თამარ ბოლქვაძე - ტერორიზმის ეტიმოლოგია

ქაბულის ცაზე დანაჩეხი მოჩანს ხედები,

მზე შუბისტარზე შურისგების გამო ააცვეს.

ნაჰაშიშარზე შარუშიში მოჯაჰედები

ომს დარაჯობენ მშვიდობისგან უკვე გაძარცულს.

შურისძიებამ გაუტენა გული შარიათს,

ჭროღა თვალები მოეწკურა ბებერ ეფენდის.

გადაერიათ იარაღი კაცებს შარიანს,

სისხლის ყივილით, სისხლის ტბებით, სისხლთან შეხებით.

ქვიშის საათი უნდო წუთებს ცრის ჩამომარცვლით,

უდაბნოს თავზე მოახვიეს მიზნად მირაჟი.

ქაბულის ზეცას ინისფერი ჩადრი მოაცვეს

და აზიური მაჯისცემა დგება ყირაზე...

ომს დარაჯობენ შარუშიში მოჯაჰედები,

ცა ისევე სდუმს, როგორც ადრე, ანდა არასდროს.

მოდის მშვიდობა იდაყვამდე მოჭრილ ხელებით

და ომის ღმერთებს უკანასკნელ ტყვიას სთავაზობს...