ვაჟა ხორნაული - კამათის მერე

კაცი ცეცხლი და ზვავია,

ქალი წყარო და ოქროა.

სიკეთე უფლისეული

ქალში ათასჯერ უფროა.

თუ წახვალ, სიმარტოვეში

გაუხუნდება მერდინი,

სევდისას დაიღუღუნებს

ფრთამოტეხილი მტრედივით.

კაცი ელვა და ხმალია,

ქვის და ფოლადის მჭრელია.

ქალი სამოთხის სითბოა,

გულის ფიქრებით ბრძენია.

კაცი ვერ გადაეჩვევა

ომს და მგელივით ხეტიალს.

ნექტარი სიყვარულისა

თუ ცრემლი სიბრალულისა

ქალში ათასჯერ მეტია!