ელგუჯა უძილაური - მოიცა

მოიცა, ერთ წუთს შეჩერდი ჩემთან.

ყოველთვის ასე სად მიიჩქარი?!

შენ ხომ სიცოცხლის განთიადი ხარ

და ერთადერთი მზე საფიცარი.

შეჩერდი, ერთად შევხედოთ მინდა,

ცისარტყელების ციდან ჩამოსვლას.

ვკითხოთ ტკივილი ხომ არ აწუხებს

ღრუბელს, თავნება ქართან ნაომარს.

მითხარი, როგორ გადავარჩინო,

გული, დაჭრილი შენი მახვილით.

დაგეძებს ჩემი მღელვარე სისხლი,

ცის ლაბირინთებს უხმობს ძახილით.

მოიცა, მინდა ეს გაზაფხული,

შენ მოგილოცო ლურჯი აპრილით.

მოიცა, თორემ გადავირევი,

თავს ჩამოვიხრჩობ შენი მანდილით.