ელგუჯა უძილაური - გულო, თუ გინდა გულით იმღერო...

გულო, თუ გინდა გულით იმღერო,

შენ ისევ ღვინომ უნდა გიშველოს,

უნდა გაუძლო სოფლის სიავეს,

თუ ვინმემ გითხრა არ დაიჯერო.

ჭირში მყოფს, შენდა საბედნიეროდ,

კარს მოგადგება ვინმე მენავე

და ცრემლის ზღვიდან ისე გაგიყვანს,

ჭირსა და ლხინში ისე გაგიტანს,

სამაგიეროდ არაფერს ითხოვს...

და ყველაფერი ისეა თითქოს,

რომ აღარ ჭკნება სულის ყვავილი

და ყველა ქუჩას ისე გაივლი

აღარ შეგხვდება გზად მათხოვარი,

ბედისგან ობლად მინატოვარი.

რომ მზე იქნება მუდამ აპრილის

და მთიდან მთაზე ის არ გადივლის,

არ ჩამოწვება მიწაზე ბინდი

და შენც იქნები ყოველთვის მშვიდი.

გულო, რომ გითხრან, არ დაიჯერო,

რომ ვინმე შენდა საბედნიეროდ

შენთვის აშენებს სიმშვიდის ტაძარს,

მოვა და გულში ჩაგიქრობს ხანძარს

გულო, ეს მითი არ დაიჯერო.