ზინა სოლომნიშვილი - ასპარეზზეა უსინდისობა...

ასპარეზზეა უსინდისობა,

მიხვდი? ჭკუაზე მოხველ კაი დროს,

ვის უნდა, ნეტავ, შენი სინდისი,

შენი სინდისით კუჭს ვინ გაიძღობს?!

დღეს სიბინძურე ზეიმობს მხოლოდ,

ეგ რა ეჭვების დაგჭრა ისრებმა!

ვინ რა ქვად იხლის მაგ შენს სიწმინდეს,

არც შეიჭმება, არც ჩაიცმება!

თავს გაჭარბებენ ყველა როსკიპნი,

რა გრიგალივით დახვალ მწყრალი დღეს...

რითი ქედმაღლობ, პატიოსნებით?

გზაზე რომ ეგდოს, არვინ წაიღებს.