დოდო გვიშიანი - ღამე ჯადოსნური ზღაპრიდან

გალურსული კედელბერა

კუდით ხეზე ეხვია,

ბუხრის მილში მიძვრებოდა

კნაჭა ტარიგრეხია;

კუდიანი დედაბერი

ცოცხით დაგელაობდა,

ხეზე ჩიტი ფაჩუნობდა,

სხვენზე კატა კნაოდა;

ქილას, სარზე ჩამომხობილს,

მთვარე ეპარებოდა,

ჭინკა - ბნელში დამალული -

ქვებს ისროდა ერდოდან;

ალი - წყლის პირს ჩამომჯდარი,

გზას გასცქერდა მალ-მალე,

დაბალ ხმაზე ღიღინებდა,

ივარცხნიდა დალალებს;

ბაღში სთვლემდა შავქლიავი

და კენწეროს არხევდა,

ღამის სული ფარფატებდა

ჩაბნელებულ ფანჯრებთან...