ბერდია ბერიაშვილი - გოლუაფირო

მაგ თვალთა შუქი გადაფრქვევია

უღრუბლო დილას, ამ ცა საფირონს.

ფეხქვეშ გეგება ვარდი და ია,

საით მიდიხარ, - გოლუაფირო?!

ტანაშოლტილო კოლხის ასულო,

თან გდევს ოცნება - ზღვა უნაპურო.

შენზე სიმღერა ვერ დავასრულო,

რაკი დავიწყე, - გოლუაფირო.

მაგრამ რად მიჭირს დღეს შენი ნახვა,

ჩემგან შორს წასვლა არ დააპირო.

საით მიდიხარ, მითხარი, ახლა?

ვისკენ ისწრაფი, - გოლუაფირო?!

ბაღიდან ისმის ფრინველთა სტვენა,

მსურს ყველა ჩიტი შენსკენ ვაფრინო.

ხარ ჩემი დარდი და აღმაფრენა,

ჩემო ტკივილო, - გოლუაფირო!

შენც ამოიდგი, ძვირფასო, ენა,

მსურს შენი ჰანგი გულს მომაფინო.

ვიცი, სულ მალე გაგივლის წყენა

და ჩემთან მოხვალ, - გოლუაფირო!