ბერდია ბერიაშვილი - ოცნების სახლი

მე ეს სახლები არ მომწონს, არა,

არცა კედლები, არც სახურავი.

მე ეს სახლები არ მომწონს, არა

და ნუ დამძრახავთ, ძმებო, ნურავინ.

მას ყველა მხრიდან კედლები ფარავს

და სულს მიხუთავს მძინავს თუ მღვიძავს.

სოცოცხლედ მიღირს, სიცოცხლედ კმარა,

ვიწვე და თვალით ვუმზერდე მიწას.

თქვით, აბა იმას რა შეედრება,

იწვე, უმზერდე ვარდების ღიმილს.

ან მოუშალეთ ჩემს სახლს კედლები,

ან გაუკეთეთ კედლები მინის.

ყვავილთა ფერი, ბალახთა ფერი,

უცებ, ერთბაშად მოაწყდეს მინებს.

მოაწყდეს, როგორც დიდი სიმღერა,

რომელიც მერე არ დაგაძინებს.

გთხოვთ, მოუხერხოთ სახურავს რამე,

არც კრამიტის მსურს და არცა ისლის.

მსურს, სახლს ეხუროს ცა მოკამკამე,

ან იისფერი ეხუროს ნისლი.

წევხარ? ოცნებით ცად აიჭერი,

აღარ ინატრებ, მერწმუნე, არას,

რა ვქნა, არ მიყვარს სხვაგვარი ჭერი,

არც მიყვარს, რადგან ჩემს წილ ცას მპარავს.