პაატა ნაცვლიშვილი - საოცნებო ზღვა და ცაა...

საოცნებო ზღვა და ცაა,

ბინდი უყვართ ლიანებს,

გათენდება სადაცაა,

შენ კი სულ იგვიანებ.

დაფნისა და პალმის ჩეროს

ფანტომები გროვდება,

სიყვარული, დავიჯერო,

ახლა არ გაგონდება?

ღამით ზღვა და არა დღისით,

ჩრდილი ცისფერ აფრისა,

დასასრული, დასაწყისი

უშორესი ზღაპრისა.

საოცნებო ზღვა და ცაა,

მთვარე ეტყვის ლიანებს:

გათენდება სადაცაა,

ის კი - დაიგვიანებს.