ვასილ ბესელია - როცა ღვარცოფად საზღვარს გადივლის...

როცა ღვარცოფად

საზღვარს გადივლის

დღეები ფიქრის,

იჭვის და დავის,

შემრჩება ხელში

ფუჭი ქადილი,

ვერ გავიტანე ლექსებით თავი...

ძნელია ახლა რამის გარჩევა,

ადგილს კარგავენ სულში საგნები,

შენ ერთიც წახვალ...

და მე დავრჩები

ერთ მთელზე, ალბათ, ერთით ნაკლები...

წყდება დღეები

თითზე დათვლილი,

და გზები წყდება აღმართის ძირას...

... წევს ზამთრის ღამე მურა დათვივით

და უშველებელ ბუნაგში ძინავს...