აკაკი წერეთელი - ალბომში

ახლანდელ ქალებს

ტკბილ სიტყვას ვეღარ ახერხებ,

ასეტყვებ აუგიანსა!..

რა გითხრა ენატარტალას,

უკუღმართს, საქმეგვიანსა?!

ლეჩაქმოხდილი, ტრიხინა,

მხარ-მკლავებ, გულ-მკერდ-ტიტველა

გადასკუპ-გადმოსკუპდები,

დაჰფრენ ვით ჭრელი პეპელა.

ვერ ჰხედავ ქვეყნის ბორკილსა,

გულს არ გწვავს მისი მონება!..

გრძნობა მტრისაკენ გიზიდავს,

მათკენ ჰქრის შენი გონება!..

ძველი დედების ქალობა

დაგვიწყებია, სთქვი, თუ რად?

უპიროდ გახუნებულხარ,

აჭრელებულხარ სკვითურად!..

მაშ რაღად გიკვირს, რომ მძულდე...

არ ვიყო შენი მოყვარე

და შენს სიცოცხლეს მერჩიოს

ძველი დედების სამარე?!