აკაკი წერეთელი - ახლანდელი სიმღერა

"ჰკარ! მოჰკალ! შეჰკარ! შეიპყარ!"

იძახდენ ჩვენი ძველები...

ამას მოწმობენ მტრის სისხლით

ნაღები მთა და ველები.

„ჰკარ! მოჰკალ! შეჰკარ! შეიპყარ!“

დღესაც ვიძახით ყველანი;

მაგრამ ენა გვაქვს ფარ-ხმალად

და სისხლად შავი მელანი!..

ვეფხ-ლომნი გადაგვიშენდენ,

გამრავლდენ მელა-კატები...

„ჰკარ! მოჰკალ! შეჰკარ! შეიპყარ!“

ჰყვირიან ადვოკატები.

ძმა ძმას არ ჰზოგავს, მამა შვილს,

მოყვარე მოყვრის მტერია!..

„ჰკარ! მოჰკალ! შეჰკარ! შეიპყარ!“

ყოველგან ასე სწერია!..

იჩაგრებიან საწყლები...

ცრემლზე ცრემლს ჰღვრიან მწარესა:

„ჰკარ! მოჰკალ! შეჰკარ! შეიპყარ!“

გაისმის ყოველ მხარესა!..