გალაკტიონ ტაბიძე - თითქოს დაეშვა შავი ფარდები

თითქოს დაეშვა შავი ფარდები,

ღამის წყვდიადში ისე მწარდები. 

ცივია გული? არ შეუყვარდი? 

არაფერია, შეუყვარდები.

თითქოს რაიმეს ნიშნავს, რომ ბნელი 

ღამით იმავე მეგობარს ელი, 

არაფერია, არაფერია - 

მოვა სხვა უფრო დაუძლეველი.

წარსულზე ოხვრას რისთვის უნდება 

ყოველი დღე და შებინდბუნდება? 

თითქოს ბერდები? არაფერია! 

ათასი წლისაც არ დაბერდები.