მუხრან მაჭავარიანი - სოფელში

- გამარჯობა, როგორა ხარ?

- როგორც დაგიბარებია...

- სოფელში რა ამბავია?

- მშვენიერი დარებია.

- სხვას რას მეტყვი?

- სხვა რა გითხრა...

ვახტანგი ღმერთს ჰყვარებია!

- ვინ ვახტანგი?

- აღარ გახსოვს, -

შენთან დაუმთავრებია...

- მერე?

- ბიჭი შეეძინა -

საცრისტოლა თვალები აქვს...

- ბიჭი?!

მართლა?!

აი, მესმის!..

აბა, მე არ მგვანებია...

- რავა, შენ რა?

- რაღა, რავა, -

კაცი ჯავრით აღარა ვარ, -

სამი შვილის მამა ვარ და...

სამივენი ქალებია...