ოთარ ჭილაძე - დღეს სხვანაირი მზე იკბინება...

დღეს სხვანაირი მზე იკბინება,

დღეს ახალ ზეცას ეხსნება რიდე,

და როიალის თეთრი კბილები

შეჭმას უპირებს შენს ლამაზ თითებს...

თურმე დახშული მქონია ყური

და გული ჩუმი, ვით კურდღლის სორო,

თურმე, ვითმენდი უამრავ სურვილს

და ვერთობოდი ფიქრებით მხოლოდ.

მაგრამ - გათავდა! ღმერთმა ინება,

რომ მეც ამქვეყნად ჩემს ყანას ვმკიდე...

დღეს სხვანაირი მზე იკბინება,

დღეს ახალ ზეცას ეხსნება რიდე...