მარიამ წიკლაური - დარისა და ავდრისა

 რაც არის, არის,

მოდი, ერთად შევსანსლოთ ქარი!

რაც არის, არის,

დავაყოლოთ ზედ წვიმის წყალიც.

რაც არის, არის,

თუ მოვაყრით ქარაშოტს მარილს,

იქნება ბევრად გემრიელი

და ბევრად წყნარი.

რაც იყოს, იყოს,

მოდი, ჩავყლაპოთ ჭექა-ქუხილიც!

რაც იყოს, იყოს,

დაგვანაყრებს, რა უნდა გვიყოს?!

რაც იყოს, იყოს,

თუ მოვაყრით ქიშმიშს და ნიგოზს,

იქნება უფრო გემრიელი,

მე ასე ვფიქრობ.

მერე ავდგეთ და შევახრამუნოთ

მსუქანი ღამეც.

უმად არ ვარგა,

დავუბრაწოთ ორივე მხარე.

რაც იყოს, იყოს,

მე გიწილადებთ ღამის ყიყლიყოს,

თქვენგან ერთ-ერთმა კი

მზიანი დილა მიყიდოს!