ჯანსუღ ჩარკვიანი - წყვილი ცრემლი

მათრახივით გადვუჭირე

ცისფერ ქურანს ელვა,

უკან მომდევს სისხლიანი

ყვავილების წყევლა.

ცხენის ძუით გამოვისკვენ,

პაწაწინა წყენა,

გულზე ჩუმად დავიკიდე,

როგორც აღმაფრენა.

წყვილი ცრემლი ვარსკვლავისა

დაგიტოვე მძევლად,

დანარჩენი გულისპირზე

დაგიმღვრიე ცრემლად.

არ გეგონოს,გადმომაგდო

გაფრენილმა ცხენმა, -

ხერხემალში გამიარა

სიყვარულმა შენმა.