ვასილ ბესელია - ვინ გაარჩევს...

ვინ გაარჩევს

ამდენ მტერს და მოკეთეს,

ამდენ სხვა ხალხს,

ამდენ შლეგს და ბნედიანს...

ოღონდ თქვენ ნუ უღალატებთ,

პოეტებს

უთქვენოდაც დაწყევლილი ბედი აქვთ...

ერთნაირად გული თუ დაწყვეტიათ

სიკვდილის წინ ტატოსა და გოეთეს...

მარტოობა პოეტების ბედია -

ოღონდ მარტო ნუ დატოვებთ პოეტებს...

იმ ერთს ერთხელ,

თურმე ფრთები დასჭირდა,

ვით პატრონი,

ვით სივრცე და მაჯამა...

გადმოგვხედა მერე ღია ფანჯრიდან,

გადმოგვხედა და...

სირცხვილი გვაჭამა...