ნიკოლო მიწიშვილი - მე ავაშენე სიყვარულის უცხო ტაძარი

მე ავაშენე სიყვარულის უცხო ტაძარი.

მაგრამ ტაძარში არ ისვენებს წმიდა სამება.

იქ, წიფლის ჯვარზე გარჩენილა ქრისტეს წამება.

იქ სიცივეა და ტირილი გულშესაზარი.

საშინელებით მემუქრება მე ვალტასარი.

მიახლოვდება უნახავი რამ დაღამება.

ვერ მოვასწარი თვალის დროზე დახამხამება, -

ისე ჩაიქცა ჩემი გული, ნაღაზღაზარი.

გატეხილ ღამით მესიზმრება შენი სიზმარი,

თითქოს შევიქენ შემწირველი მაღალ ტიბეთის.

უცბად აღსრულდა დაპირება უწყალო ბედის -

დავეცი კლდეზე და სიკვდილით გადავიზმორე.

შენ ზიარებად შემასმევდი სისხლიან ღვინოს,

რომ სიყვარულმა ლურჯ ძარღვებში დაიჭიხვინოს.