სიმონ ჩიქოვანი - ცხოვრების ზღვაო

ცხოვრების ზღვაო,

არ განასხვაო

დღისა და ღამის ბრუნვა უცვლელი.

გთხოვ, დაახვავო

ვრცელ სასაფლაოს

ცაცხვის ფურცელი.

როგორც ნუგეში,

მშობელ კუთხეში,

ააშრიალე ყველა საფლავი,

და ჩემს უბეში

ჩასვი ბარტყივით

სატრფოს ვარსკვლავი.

ავს გამარიდე,

არ გავღარიბდე,

არ ჩამომენგრეს მამულში სხვენი,

მრუდე საწუთროს ავხადე რიდე,

ბედს გავურბი და მიმაფრენს ცხენი.

ვით ალიონი

მომსდევს სიონი.

მივქრი,სირბილში მტკვარს ვეჯიბრები.

გუმბათს მიაგავს ვრცელი ციონი

და ჩამქრალ სანთლებს - ჩემი ფიქრები.