მამუკა სალუქვაძე - ლექსი ავდარი

ქარმა მშვილდივით მოზიდა შვინდი,

უეცრად დასხლტა ღრუბლებზე ელვა

და გაიბზარა საღამო მშვიდი

სამყაროს სულში აღიძრა ღელვა.

გაუმჭვირვალე ნისლების ასხმა

ჩამოეკიდა ცას ყელზე მძივად,

ეკლიან წვიმის მოვარდა თავსხმა,

ამოიოხრა ბუნებამ ცივად.

ქარი კი მხოლოდ მღეროდა ერთზე -

გადაეშალა დღეთა დავთარი

და სამოცდამეათე გვერდზე

გადაეკითხა ლექსი ავდარი.