თამაზ ჩხენკელი - და მიიწურა ეს წელიწადიც

და მიიწურა ეს წელიწადიც

ვით სიყვარული. დგას დეკემბერი.

მე არ ვთქვი და შენც არ დამიცადე,

არ შევაწუხეთ გრძნობა ბებერი.

ოჰ ეს სიბერე! - ჩემთვის ზამთარი,

შენთვის იქნება ზაფხული ბოლო

კუდის მოქნევა - ვნების აფთარი

სიშმაგით ამ დროს იღვიძებს მხოლოდ.

არ იცდის დრო და შენც აღარ იცდი,

კვლავ იძირები ახალ მორევში...

მშვიდობით. გლოცავ, თუ არ დავმიწდი,

გწყევლი. შენს ნატვრას თუ ვერ მოვეშვი.