ვახტანგ გოგოლაშვილი - ძველი სურათი

აუ, რამდენი დილა გასულა,

რამდენი ღამე გამილევია,

შეხედე კარგად, ჯერ ამ სურათში,

ერთი ჭაღარაც არ მირევია.

რა ფაციფუცით გარბიან წლები,

კაცი ყველაფერს ხვდება რა გვიან,

შეხედე კარგად, ჯერ ამ სურათში,

ერთი იმედიც არ დამკარგვია.

ათასი ლხენა, ათასი დარდი,

გადაყოლია ზამთარს ფიფქიანს,

შეხედე კარგად, ჯერ ამ სურათში,

სიკვდილზე ერთხელ არ მიფიქრია.

ო, ცარიელი დღეების რიგი,

რა საშინელზე საშინელია,

შეხედე კარგად, ჯერ ამ სურათში,

ხვალინდელი დღის არ მშინებია.

შეხედე კარგად და დაგანახებს,

რა ცოტა დარჩა დასასრულამდი,

ახალგაზრდობის, ახალგაზრდობის,

ახალგაზრდობის ბოლო სურათი.