მორის ფოცხიშვილი - ღმერთმა გაშოროს

ღმერთმა გაშოროს ფათური,

ძიძგილაობა, ჯიბრი,

არაქართული ქართულით

აზვირთებული წიგნი.

არამხატვრული მხატვრული,

ვით უდარდელი დარდით

არაკაცურად ნატრული

ანგელოსური მადლი.

არაჯალათი ჯალათის

შუბი წამახულ წვერით,

არა ძმაკაცი ძმაკაცი

და არამტერი მტერი.

გაშოროს სხვათა ნათესი,

ჯილდო ნაყიდი ვერცხლით,

უსიყვარულო ალერსი

და უსინათლო ცეცხლი.