ტარიელ ჭანტურია - მებაღის სიყვარული

გავყიდი მიხაკს. მიხაკის ფასად

ვიყიდი ვარდებს. ვარდების ფასად

ვიყიდი იებს. იების ფასად

იების ფასად - გიყიდი შენ!

წაგიყვან ბაღში, ხოლო ბაღიდან

წაგიყვან სახლში, ხოლო სახლიდან

აგიყვან ცაში, აგიყვან ცაში -

ერთად ვიცხოვრებთ ღრუბლებში ჩვენ!

ცისარტყელები გვექნება სიმად!

დაველოდებით ამინდებს კვიმატს,

და ღრუბლებიდან წამოვალთ წვიმად -

დავაწვიმდებით მიხაკებს ჩვენ!

ხოლო ნაწვიმარ მიხაკის ფასად

ვიყიდით ვარდებს! და იმის ფასად

ვიყიდით იებს! და იმის ფასად

იების გოგოს ვიყიდით ჩვენ!

იების ბიჭსაც ვიყიდით ჩვენ!..