სილოვან ნარიმანიძე - ნატურმორტი

მცხეთა, ყვავილები, ბაღი,

მებაღე და

ბაღში ვაზით მოხატული

ლურჯი თაღი,

- გახსოვს?

სევდიანი წიწამურის

ტყე ცვარ-ნამით მინამული,

- გახსოვს?

ო, ის წლები გაცინების,

შეხვედრის და დაცილების.

გვიხაროდა ყველაფერი,

სულ სხვა იყო მცხეთა მაშინ,

ელვარე და მზენაფერი!..

ყვავილები, ყვავილები,

სამაისოდ, არაგვზე რომ

ზევით-ქვევით ყვავის ზვრები…

დილა იყო მზენაფერი,

შეეფარა ტყეს ირემი,

გვიხაროდა ყველაფერი,

- გახსოვს?..