გივი გეგეჭკორი - დაბადების დღე

ბავშვებით შემოხვეული

ღვინონასვამი დგახარ

და ვიოლინოს ატირებ...

იმათ სიცილს და ხარხარს.

ზემოდან ეპასუხები

აკვნესებული ხემით,

გეპოტინება მრავალი

ხელი დასვრილი კრემით.

შენ დიდხანს ვეღარ გაუძლებ

ახალგაზრდობის ალყას

და სანამ დაემხობოდე,

ალბათ დაიწყებ ყანყალს.

კარადის ქვემო უჯრიდან,

გამოიღებ და გაშლი

სუფრას და მხრებზე მოიხვევ...

წინ წაგდებული ფაშვით.

დადგები, ოთახს აავსებ

დონ ბაზილიოს ბანით

და თავს მოიკლავ ხარხარში

სერვიზის ბლაგვი დანით...