მუხრან მაჭავარიანი - არარაობა ყველაფერი მგონია ოდეს

არარაობა ყველაფერი მგონია ოდეს

(კიდევ კარგი რომ იშვიათად ეს ხდება ხოლმე)

და აღარ ვიცი

რით დავღონდე,

რა მიხაროდეს,

ანდა იმედი

რისი მქონდეს,

რისი არ მქონდეს! -

იმდროს,

იმჟამად -

ერთადერთი შენ ხარ მარტოდენ -

ძალუძს რომელსაც

ჩემზე სევდა არ გაბატონდეს.

შენ რომ არ იყო! -

მე წარმოდგენა,

წარმოდგენაც კი

არ ძალმიძს ამის! -

წინაშე შენსა -

მზევდება ენა!

წინაშე შენსა -

დღევდება ღამე.