ლაშა გახარია - ყივჩაღის მონანიება

ვაი, რა ცუდი ყოფილა,

ქართველთან ცოლზე ცილობა...

თავქვეშ ტყაპუჭი მიგდია,

ცხენიანა მჭირს ჭრილობა!

რა მწუხთში ამოწობილა

უცხო მიწა-წყლის შვილობა.

ყარყუმის ბეწვის მაგიერ -

ჭინჭნარში წოლა ტიალად;

უნდომლად ჩამორთმეული

ალალ მოწვდილი ფიალა...

მაგრამ... თუ ქალმა გაცდუნა,

მაგრამ... თუ გულმა იალა,

სისხლმა იყივლა, აგჩინჩხლა

თივისებრ აგაბრიალა!...

ხორცი - ხოხბისა კი არა,

პური - თავთუხის კი არა,

ღვინო - მუხრანის კი არა...

უმალ ბეწვი თმა მოგარჩენს,

ურჩომიმც გჭირდეს იარა.

ვაი, რა შარი ყოფილა,

ცაი, რა ზარი ყოფილა,

რა ბინდისკარი ყოფილა -

ქართველოს ცოლზე ცილობა...

ქვიშას ვჭამ მუხრანისასა

ათასგანა მჭირს ჭრილობა!

* * * * * * *

ვაი, რა ცუდი ყოფილა

ცოლზე ქართველის ცილობა…

თავქვეშ თოქალთო მიდია,

ათასგანა მჭირს ჭრილობა.

ვაი, რა მწარე ყოფილა

სხვისი მიწისა შვილობა!

ირმის ტყავისა სანაცვლოდ 

ჭინჭარში გდება, ტიალად,

ხელუკუ ჩამორთმეული

ძმურად მოწვდილი ფიალა,

მაგრამ... თუ ქალმა გაცდუნა,

მაგრამ… თუ გულმა იალა,

სისხლმა იყივლა, აგჩინჩხლა,

თივისებრ აგაბრიალა!..

ხორცი ხოხბისა კი არა,

პური - თავთუხის კი არა,

ღვინო - ბადაგი კი არა...

თმის ერთი ღერიც მოგარჩენს,

ათასიმც გჭირდეს იარა!

ვაი, რა ძნელი ყოფილა,

ქართველთან ცოლზე ცილობა!

ქვიშას ვჭამ მუხრანისასა,

ათასგანა მჭირს ჭრილობა...