იეთიმ გურჯი - სიმღერა

სიმღერების გამჩენი, გეტყვით, გამაიცანით,

საქართველოს მგოსანი იეთიმ-გურჯი იცანით.

მის კალამი უეცრად შაგიპყრობს და დაგიჭერს,

რაც რომ გულით გინდოდეს, იეთიმ-გურჯი დაგიწერს.

სიყვარულის ღმერთია, წერით ცაში აგიყვანს,

ვინც რომ გულით გიყვარდეს, მის კალამი მოგიყვანს.

სიყვარულის წამალი, არშიყობის ექიმი

სხაგან აღარ ეძებოთ, ჰპოვეთ გურჯი-ეთიმი.

სიყვარულმან შეგიპყროს, ვერას გარგებს ჰაბაში,

მარტო წამალს იშოვი იეთიმ-გურჯის სტამბაში.

აკვანშივე ბავშვებსა ლაპარაკსა ასწავლის,

ვისაც სიმღერა გინდათ, იეთიმ გურჯი გასწავლით.

თამადობის პატენტი არ ეძებოთ სხვასთანა,

თუ ქეიფი მოგინდეთ, წადით იეთიმ ძმასთანა.

საქართველოს მხარეში ყველგან იმღერიანო,

რუსთაველის შვილობილს იეთიმ-გურჯი ჰქვიანო.